Sanjha punjab 23-a

ویکھن نوں تے یوہانا دے ویاہ اتے اوہدے آپنے جیون ساتھی چنن اتے کسے نوں کوئی اعتراض نہیں اے۔ تے جے کر کسے نوں ایس اتے اعتراض ہے وی، تے اوہنوں ایس گل دی ہمت نہیں پیندی کہ اوہ ایس دا کھلا کھلا وکھالا کرے۔ اوہدی اک وجہ تے ایہہ ہے کہ ایتھے آپنا جیون ساتھی چننا ہر بندے دا ذاتی عمل اے۔ تے دوجی وجہ آزادی اے۔ جیہدا جو دل کرے اوہ اوسے طرحاں آپنا جیون ساتھی چن لوے۔ کسے گورے نوں جے کوئی کالا بندہ چنگا لگدا اے تے اوہ اوہنوں آپنا ساتھی چن سکدا اے۔ ہور تے ہور ایتھے اک مرد نوں اک ہور مرد آپنا جیون ساتھی بناؤنا چنگا لگدا اے جاں اک زنانی نوں اک ہور زنانی آپنا جیون ساتھی بناؤنی پسند اے تاں اوہدے تے کسے نوں کوئی اعتراض کرن دا حق نہیں اے۔ ایہو گل عمراں دے فرق تے وی لاگو ہوندی اے۔ جے کسے زنانی دی عمر وڈی اے تے بندہ گھٹ عمر دا اے تاں ایہہ اوہناں دی چون اے۔ جے کوئی بندہ وڈیری عمر دا اے تے کوئی کڑی اوہنوں پسند کر لیندی اے تاں ایہہ اوہناں دی زندگی دا مسئلہ اے۔ عمراں دا فرق اصل وچ پنڈے دی عمر دا فرق نہیں ہوندا سگوں کئی وار ایہہ فرق دماغ تے سار دا وی ہوندا اے۔ اک بندے دی سار دی عمر ضروری نہیں کہ اوہدے پنڈے دی عمر نال ترے۔ کئی وار اک بندہ آپنی سار دی عمر دا پینڈا آپنے پنڈے دی عمر توں چھیتی پورا کر لیندا اے تے کئی وار بندے دا پنڈا بڈھا ہو جاندا اے پر اوہدی سار دی عمر جاں دماغ بہت پچھے رہ جاندے نیں۔ پچھمی دنیا وچ ایہناں گلاں نوں تقریباً قبول کر لیا گیا اے۔ پر ساڈے سماج وچ دوہرے معیار نیں۔ ایتھے پاکھنڈ دا راج اے۔ اسیں گٹے نال بھروٹا بنھدے وی آں تے نال اوہدی نندیا وی کردے ہاں۔ مینوں ایہو جہیاں کئی کہانیاں یاد نیں تے ایہو ہی کہانیاں سن جیہناں مینوں یوہانا دے ویاہ وچ جان توں روکن دی کوشش کیتی۔

نکے ہوندیاں میرے پنڈ وچ لوکاں لئی پانی بہت اہم تے مہنگی شے سی۔ تے بندیاں نوں ایہہ حاصل کرن لئی بڑی محنت کرنی پیندی سی۔ پنڈ وچ ایہنوں حاصل کرن دے دو طریقے سن۔ پہلا سی ماشکی راہیں۔ پنڈ دے دوجے کمیاں وانگ ماشکی بہت اہم بندہ سی۔ اوہدی اک وجہ تے ایہہ سی کہ اوہ تہانوں پانی لیا کے دیندا سی۔ دوجی وجہ ایہہ سی کہ پنڈ دا اکلا بندہ ہوندا سی جو کسے وی ٹبر نوں اوس ٹبر دے آپنے بندیاں وانگ روز تے دن و چ کئی کئی وار ملدا سی۔ ایس پاروں ایہہ بندہ وی اوس ٹبر دا اک طرحاں دا ممبر ہو جاندا سی۔

بہتے ماشکی سویرے سرگھی ویلے اٹھدے سن تے ایہناں پنڈ دے کھوہ چوں بوکیاں نال پانی کڈھ کے مشک بھرنی، فیر اک اک گھر وچ جا کے گھڑیاں وچ پانی بھرنا۔ ایہہ پانی مفت نہیں سی ہوندا۔ ہر بندہ جنیاں مشکاں روز لیندا سی اوسے حساب نال اوہنوں ماشکیاں نوں سیپ (بھاڑا) دینا پیندا سی۔ پانی حاصل کرن دا دوجا طریقہ نلکے سن۔ کجھ امیر لوکاں ماشکی دی محتاجی توں بچن لئی گھر نلکے لوائے ہوئے سن۔ اوس زمانے وچ ایہہ نلکے اینے مہنگے ہوندے سن کہ ہر بندے وچ ایہناں نوں لواؤن دی ہمت نہیں سی ہوندی۔ اوہ بندے جیہناں کول نہ تے ماشکی نوں دین جوگے پیسے ہوندے سن تے نہ ہی اوہ آپنا نلکا لوا سکدے سن، اوہ کسے ہور بندے دے نلکے توں جا کے پانی بھردے سن۔ ایہو جہیا اک نلکا ساڈے گھر وی لگا ہویا سی جیہڑا پورے محلے وچ اکو اک سی۔ ایس پاروں سارے محلے دیاں زنانیاں ساڈے گھروں پانی بھرن آؤندیاں سن۔ ایہناں زنانیاں وچوں اک بھگو وی سی۔ اوہدا اصلی ناں تے بھاگن سی پر سبھ اوہنوں بھگو کہندے سن۔ اوہ ذات دی موچن سی۔ بھگو دا وڈا سارا ٹبر سی، کئی بھین تے بھرا۔ ایہناں وچوں کجھ مرد تے جتیاں سیوندے سن تے کجھ مزارعے سن تے لوکاں دی واہی کردے سن۔ جو موچی سن اوہناں کول لوک نویں جتی سواؤن تے کدے کدے ہی آؤندے سن، بہتے بندے ٹٹیاں جتیاں گنڈھاؤندے سن۔ تے انج ایہناں دی آمدنی اک طرحاں دی سیپ سی۔ چھ مہینیاں مگروں کجھ دانے تے کسے ہور فصل دا کجھ حصہ۔ ایس گھاٹے نوں پورا کرن لئی بھگو دے باقی بھین بھرا واہی کردے سن۔ بھگو دی ڈیوٹی گھر دا کم کاج تے پانی بھرنا سی۔ اوہ ساڈے گھروں دن و چ کئی وار پانی بھرن آؤندی سی۔ میری ماں تے میریاں بھیناں اوہدے تے ترس کھا کے اوہنوں کدے کوئی پرانا کپڑا دے دینا، کدے کوئی پرانی جتی تے کدے اوہنوں روٹی دے دینی۔ انج اوہ اک طرحاں دی ساڈے گھر دی ممبر بن گئی۔ اوہنے آپنے گھر دی ہر گل سانوں دسنی۔

باراں دے رہن والے گھراں وانگ بھگو دے ٹبر وچ وی وٹے سٹے دا رواج سی۔ جے تسیں کسے گھروں رشتہ لینا اے تے نال ای تہانوں دینا وی پینا ایں۔ اوہدے دوجے بھین بھرا تے انج وٹے تے ویاہے گئے پر پچھے بھگو تے اوہدا اک بھرا رہ گیا۔ بھگو دے گھر والے آپنے ایس منڈے دے رشتے لئی بڑے بھجے پر اوہناں نوں کوئی اجیہا رشتہ نہ لبھا جتھے اوہناں دے منڈے واسطے کڑی دے نال بھگو واسطے کوئی جوان منڈا وی ہووے۔ اویں جویں ویلا لنگھدا تیوں تیوں بھگو دا بھرا ویاہ کرواؤن لئی کاہلا تے بے صبرا ہوندا جاندا سی۔ اتوں اوہناں دے شریک وکھریاں گلاں بناؤندے سن۔ ہولی ہولی لوکاں تے بھگو دے گھر والیاں ایس دا ذمہ وار بھگو نوں ٹھہراؤنا شروع کر دتا پئی اوہ منحوس اے۔ اوہدے گھر وچ جو وی بھیڑا کم ہونا جاں جو وی مصیبت آؤنی، اوہدی ذمہ وار بھگو بننا۔ تے جیہدا دل کرنا اوہنے اٹھ کے بھگو نوں کٹ چھڈنا۔ بھگو نوں نیل پئے ہونے تے اوہنے ساڈے گھر آ کے رونا۔

آخر اک دن خبر اڈ گئی کہ بھگو دے بھرا نوں رشتہ لبھ گیا اے۔ پر اوہدے وچ اک ڈکا اے۔ ایہہ کڑی اوہناں دی برادری دی سی، عمروں وی بھگو دے بھرا نال میل کھاندی سی پر اوہدا بھرا کوئی نہیں سی جیہدا اوہ وٹا لے سکدے۔ وٹے توں بنا رشتہ دینا برادری وچ نک وڈھاؤن دے برابر سی۔ بڑی بَھج دوڑ مگروں گل ایہہ مکی کہ ایس کڑی دا وٹا اوہدے پیو نوں دتا جاوے۔ ایہہ بندہ اک تے پہلے ویاہیا ہویا سی تے اگوں اوہدے پوتے دوہتے سن۔ چٹی داڑھی تے منہ وچ اک وی دند نہیں سی۔ بھگو نوں پتہ لگا تے اوہ روئی تے آکھے، "اوہ تے میرے پیو توں وی وڈا اے۔" بھگو دے گھر والیاں نوں جد ایس گل دا پتہ لگا تے اوہناں پھڑ کے بھگو نوں دب کے کٹیا تے اوہنوں اندر ڈک دتا۔ کجھ دناں مگروں اوہنوں باہر کڈھیا تے اوہ مڑ روئی۔ تے اوہدے نال فیر اوہو حشر ہویا۔ ویاہ دے دن متھے گئے۔ اوہناں دے گھر گاؤن بہہ گئے۔ ہن اک پاسے گھڑے دی تھاپ تے گاؤناں دے بول اٹھدے سن تے دوجے پاسے بھگو دیاں چیکاں۔ مہندی لاؤن دا ویلا آیا تے بھگو دے بھرا ہس کے مہندی لوائی تے بھگو نوں ایہہ مہندی کٹ کے لائی گئی۔ ایسے طرحاں ویاہ دیاں باقی ساریاں رسماں چھتراں نال ہوئیاں۔ ترن دا ویلا آیا تے ماری کٹی بھگو نوں نیلو نیل پنڈے تے سجے منہ نال ڈولی وچ پا دتا گیا۔ اگے اگے ٧٠ سال دا اک بڈھا سہرا بنھ کے گھوڑی تے چڑھیا جا رہیا سی تے اوہدے پچھے پچھے ١٦ سالاں دی بھگو ڈولی وچ بیٹھی کوکدی آ رہی سی۔